.ഒടുവിൽ

ഒടുവിൽ....

ചിതയടങ്ങിയതും മക്കൾ,

അമ്മയുടെ അമ്മുവും

പൊന്നുമോനും

സ്വത്ത് പകുത്തെടുത്തു

ഒടുവിൽ,

ഒരു സെന്റ് ബാക്കിയായി-

അമ്മയുടെ ചൂടും ചൂരുമുറഞ്ഞ ഭൂമി

അമ്മയെ അടക്കിയ ഭൂമി

ഇതു പൊതുവായി നിൽക്കട്ടെ

-മകൾ പറഞ്ഞു

ഒരു റോഡ് നഗരത്തിൽ നിന്ന്

പുറപ്പെട്ടിട്ടുണ്ട്,

ഇവിടെയെത്തിയാൽ സെന്റിന്

ലക്ഷങ്ങളാ

-മകൻ പറഞ്ഞു

അങ്ങനെ അമ്മ

നെഞ്ചിൽ ഒരു മതിൽ പേറി കിടന്നു..

****

നാണം

നാടിന്റെ നാണം

നമുക്ക് വിൽക്കാം

പുഴയെയും വിൽക്കാം

മഴ വിറ്റു തിന്നാം

മാനവും വിൽക്കാം

മനംവിറ്റു വാഴാം

കണ്ടൽ തളിർക്കുന്ന

പച്ച വിൽക്കാം

വണ്ടിൻ കറുപ്പാർന്ന

കാടു വിൽക്കാം

കൊന്നതൻ ചിരിയിലെ

പ്പൊന്നു വിൽക്കാം

ഓണവും വിൽക്കാം

കാണവും വിൽക്കാം

മേടം, വിഷു,ഞാറ്റു-

വേല വിൽക്കാം

മീനം തിളക്കുന്ന

വെയില്‌ വിൽക്കാം

കിണറിലെ വെള്ളവും

കിളിയുടെ പാട്ടും

നിലാവിന്റെ കുളിരും

ധരയുടെ നെഞ്ചിൽ നി-

ന്നുയരുന്ന നിശ്വാസ-

ച്ചുടുകാറ്റും വിൽക്കാം

ചുടലയായ് വേവാം

ഒടുവിൽ നമുക്കൊരു

മഴു തിരിച്ചെറിയാം

ഗോകർണ്ണഭൂമീന്ന്

കന്യാകുമാരിക്ക്…

****