അയ്യപ്പൻ

ഓർമ്മയിൽ ഒരു ബലിക്കുറിപ്പ്

വർഷങ്ങൾക്കു മുൻപ്

ഒരു കോഴിക്കോടൻ ഉച്ചച്ചൂടിൽ വെന്ത്

മിഠായിത്തെരുവിലൂടെ നടന്ന് നടന്ന്

കൂൾബാറിൽ കാൽതെറ്റിക്കയറവേ

അതാ വരുന്നൂ അയ്യപ്പൻ

ഒരു പൊള്ളുന്ന ചിരിയോടെ

പൊള്ളുന്ന കൈ എന്റെ തോളിലമർത്തി

കിതച്ചു നിന്നു;

-തണുത്തതെന്തെങ്കിലും കുടിക്കാം

അയ്യപ്പനെ തണുപ്പിക്കാനോ

അയ്യപ്പന്റെ ആളുന്ന തീ കെടുത്താൻ

ശീതളപാനീയമോ?

അയ്യപ്പൻ തീയിൽ കുരുത്തവനാ

തീ കൊണ്ടെഴുതുന്നവനാ

തീവിഴുങ്ങിപ്പക്ഷിയാ

അയ്യപ്പൻ തീവിഴുങ്ങും

തീ അയ്യപ്പനെ വിഴുങ്ങും വരെ....

*******